حوار مع صديقى السنجل

by muhammad ayman

اغلبنا مش عارف هو بيعمل ايه هنا , وايه هو هنا اصلا , وجه هنا ازاى و هيمشى ازاى وهيروح فين ؟ انما بنقضيها عادى لاننا ببساطة مش لاقيين وقت نفكر فى الكلام ده ولو فكرنا بنقول احنا اتجننا ولا ايه ….استنى استنى استنى انا مش جاي اوعظك انا جاى انبهك لحاجة مهمة جدا ….الكفتة بقيت علاج للايدز !
ايوة يعنى عايز ايه مننا ؟ ننتحروا ؟ لا , تعالى نتكلم فى حاجة مهمة جدا …ماشى ؟ يللا بينا 🙂
مفيش حد فينا مش محتاج حد تانى يتكلم معاه و يحكيله و الكلام ده ….هتحاول تقنع نفسك انك بتقول كل حاجة لصحابك او حتى اهلك لكن حياة كل واحد فينا محتاجة اللى يكملها , يخليها حلوة , يخليها كل سعادة , يخلي عينيك تلمع من كتر الفرحة لما تكون معاه , لما تكون بتتكلم معاه ولو على النت او تشوفله كلام مكتوب يخليك تبتسم وانت مش واخد بالك …هو ده اللى ناقصنا بجد هو ده اللى هيخللى حياتنا يختلف مسارها ويخليك تبقى اللى انت عايزه وتعبر عن اللى جواك من غير ما تخاف انك تخسره او يزعل منك او انك تكدب عشان تعجبه هيخليك تغنى قدامه وهو عارف انك صوتك وحش بس هو سامعه حلو من غير اصطناع او مجاملة هو ده بجد الحب الحقيقى (مش بتاع محمد فؤاد)………….طب وبعدين ؟ نعمل ايه يعنى ؟ نحفر فى الارض عشان نلاقيه ؟ نمسك اى حد ماشى فى الشارع ونسأله انت نصى التانى ؟ …..صدقنى انا مش لاقى اى اجابة لحد دلوقتى بس اكيد مش حاجة من اللى مكتوب ده !
ياعم ده جاى يهزر ويقلب علينا المواجع و يحسسنا بنقصنا وهو مش عارف الحل !
انا مش كاتب الكلام ده اقتباسا من برنامج “العلم والايماو ” او من فيلم “Her”اللى انا بتفرج عليه دلوقتى , لا ! الكلام ده انا وانت كل يوم بنقوله لنفسنا و ساكتين عشان زى ما قولت فى الاول مقضينها وبنحاول نجاريها مش نغيرها .
تعالى نتناقش واحدة واحدة وبراحة يمكن نوصل لحل . دلوقتى انت طالب جامعة سنجل و لسه متهببتش و حد حبك , أُعجبت بكذا حد من ايام ثانوى لحد دلوقتى بس عمرك ما قولت لحد وعبرت عن شعورك وكأنك بتتقمص دور ابو فراس الحمدانى وبتقول :
نعم انى مشتاق وعندى لوعة ولكن مثلى لا يذاع له صيت 😀
منتظر حد يجى يقوللك ؟ انت فمصر يا حبيبى يعنى البنت حتى لو معجبة بيك هتخاف وتتكسف تبعتلك add على الفيسبوك وهتستناك انت اللى تتشجع وتقوم بالمهمة الصعبة دى وهتلاقيها بعديها بساعة بالظبط قبلت الfriendship قال يعنى كانت offline …المهم عشان منخرجش عن الموضوع ايه الحل ؟ الحل انك تتنحنح كدة وتفكر بعقل شوية …طب انت عايزنى اصاحب مثلا ؟ حد قاللك كدة ؟ انت بتفهم منين ؟انا قصدى تعقلها بس وتشوف حياتك بمنطق , دلوقتى انت فى الكلية و مستنيها تخلص عشان تشتغل وتجيب شقة وماما تجيبلك عروسة حلوة تقعد معاها فى الصالون و تتجوزوا و تخلفوا والحب يجى بالعشرة والكلام ده ؟ احب اقولك حمرا يا كابتن !
ياعم انت شوية تكون رومانسى شوية تكون واقعى صامت كدة ؟ ايوة ياعم ده انا صنفونى متناقض مع انى شاكك فى اللى صنفنى اصلا بس يللا …ها ؟ ها ايه ؟ وبعدين يعنى ؟ انت موافق على انك تضيع حياتك ؟ لا ! مش عارف والله برضه بس الخيار فإيدك و عقلك فراسك تعرف خلاصك وصدقنى لو فضلت كدة هتيجى كل يوم عيد الحب هتقعد تتريق على نفسك وانك هتخرج لوحدك والكلام ده وانا عارف ان الكلام ده بينطبق على كتير مننا (انا لا :P) وان فيه ناس منهم بدأوا بفكروا براحة ويشوفوا هيعملوا ايه ….طبعا انا اتمنى ان كل الناس تحب بعضها بس ياريت نخف على بعضنا وكفاية بقا نفاق 🙂

N.B :التدوينة كانت عنوانها :”الحب فى زمن الكفتة ” بس اتغيرت نظرا لاحتياطات فيروسية 😀

Advertisements