حوار قصير لابد منه

by muhammad ayman

الناس الذين يعرفون القليل يتحدثون كثيراً، أما الذين يعرفون الكثير لا يتحدثون إلا قليلاً.
إيمانا منى بالجملة اللى فاتت كنت قللت كلام سياسة فى اخر فترة إنما بالصدفة حدث حوار مع الوالد لازم يتحكى :
انا : بابا انا كان نفسى أسئلك عن حاجة من ساعة الانقلاب ….
بابا : قول يابنى …ها عايز ايه ؟
انا : احنا أنصار المعزول ؟
بابا : مين اللى قاللك كدة ؟
انا : ناس بتقول اللى مش مع خير اجناد الارض يبقى اخوان و خاين و لو عامل نفسه مش اخوان وبينزل معاهم مظاهرات او بيوافقهم فى الرأى وبيقول شرعية يبقى من انصار المعزول
بابا : طب منا عارف كل ده ! انما مين قاللك بقا اننا منهم ؟
انا : اومااال ؟
بابا : يابنى احنا انصار الحق
انا : ايوة بس انا وانت عارفين ان الاخوان معملوش حاجة للثورة من ساعة ما مسكوا الحكم و جابولنا وزير دفاع واحد كان رئيس المخابرات الحربية واللى عينه مبارك وكان من المجلس العسكرى اللى قتل الناس بعد الثورة وكل ده طبعا غير انه هدم الدولة ورجعها عسكرية تانى و قتل الاف وحجز 23 الف معتقل منهم اصحاب ليا ابرياء وعينوا واحد من كلاب حبيب العدلى وزير داخلية …..يبقوا ازاى هما الحق ؟ ده غير انهم تحالفوا مع العسكر وسابوا الناس تتقنص عيونهم فى محمد محمود و قالوا الشرعية للمجلس مش للميدان ….ازاى دول عن حق ؟
بابا : انا مقولتش ان الاخوان هما الحق ….انا بقوللك ان احنا بنأيد الحق
تعالى اقولك ايه الحق :
لما يابنى تحصل فى البلد ثورة ونشوف ان واحد حرامى من النظام مرشح نفسه قدام واحد شارك فى الثورة واعتقل فى عهد مبارك بس كان تبع شله باعت الثوار لما دخلوا مجلس الشعب والله اعلم بنيتهم بقا هما بيقولوا انهم كانوا بيحاولوا يخدعوا المجلس العسكرى ويجبروهم على تسليم السلطة فى اقرب وقت , المهم انه كان قدامنا خيارين يا سيء يا اسوأ منه مليون مرة ….طبعا اختارنا السىء وانا لسه بقول ان الشعب ده غير مستعد يخش انتخابات ويختار الا بعد ما نعمل محاكمات ثورية الاول ….. نيجى بقا للانقلاب اللى ضيع اهم حاجة حصلت فى حياتنا اللى حتى ادانا الامل ان ممكن نختار حاجة فى البلد …..دلوقتى انا انتخبت مرسى فى الجولتين وطلع مرسى فاشل , اشيله ؟ لا … احاسبه …طب وتحاسبه ازاى ؟ احاسبه ببرلمان كان المفروض هيتعملله انتخابات بعد الانقلاب بشهرين و السبب فى العطله دى كلها طبعا كانت المحكمة الدستورية اللى اخرت قانون انتخابات مجلس الشعب اللى عمله مجلس الشورى قبل الانقلاب ب 4 اشهر فيها 19 قاضى بس بيقبضوا 195 مليون فى الشهر يعنى تقريبا مليون ونص مليون جنية فى الشهر لكل قاضى ….. طبعا الناس اللى نزلت 30 يونيو بتقول ان كدة كدة مجلس الشعب كان هيبقى تبع الاخوان طب ليه متنزلش فى الشارع وتحاول تثبت نفسك فى الانتخابات و تاخد 3/2 مجلس الشعب وتعزل مرسى بطريقة صح ويتولى الحكم واحد منتخب اللى هو رئيس مجلس الشعب مكان مرسى و ننتخب رئيس جديد بحكومة جديدة طالما الشعب عايز كدة وعبر بطريقة ديمقراطية فى الصندوق …..انما شغل البلطجة وانك عشان معاك الجيش والشرطة تنحاز لجزء من الشعب عن جزء اخر و لما يعترض تقتل وتعتقل فيه دى اسمها زى ما قال ابو علاء “فوضى” …..حقنا فى اختيار حد يحكمنا يطلع حلو يطلع وحش محدش يمشى علينا امره احنا اللى نحاسبه ولو اخطأ نحاكمه….احنا مش أنصار المعزول احنا أنصار الحرية و الديمقراطية و الحق ….يارب نثبت بس
انا : ……………. معلش ممكن تعيد تانى عشان كنت بشوف الnotfications على الfacebook و twitter ?
بلاش اقول اللى حصل عشان انا هدّيته وقولتله انى كنت بهزر 😀

Advertisements